राष्ट्रिय स्वतन्त्र पार्टीका सभापति रवि लामिछानेलाई सहकारी ठगी प्रकरणमा चौथो पटक म्याद थप गरिएको छ। सहकारी ठगी, संगठित अपराध, र सम्पत्ति शुद्धीकरण सम्बन्धी अनुसन्धानका लागि उनलाई जिल्ला प्रहरी कार्यालय कास्कीको हिरासतमा राखिएको छ।
आइतवार लामिछानेलाई जिल्ला अदालत कास्कीमा पेस गरी थप म्याद माग गरिएको थियो। न्यायाधीश नवराज दाहालको इजलासले उनलाई थप १३ दिन हिरासतमा राख्न अनुमति प्रदान गरेको छ। यसअघि पनि उनलाई क्रमशः ६, ७, र १० दिनको म्याद थप गरी हिरासतमा राखिएको थियो।
लामिछानेलाई २ कात्तिकमा काठमाडौंको वनस्थलीस्थित पार्टी केन्द्रीय कार्यालयबाट पक्राउ गरी पोखरा लगिएको थियो। उनलाई विभिन्न आरोपहरूमा अनुसन्धान गर्न प्रहरीलाई समय चाहिएकोले पुनः म्याद थप गरिएको बताइएको छ।